ലക്ഷ്യം
ഓപ്പറേഷൻ തൂഫാൻ - ലക്ഷ്യം
കേരള പോലീസിന്റെ അഭിമാനകരമായ ലഹരിവിരുദ്ധ പദ്ധതിയായ 'ഓപ്പറേഷൻ തൂഫാൻ' ആദ്യഘട്ടത്തിൽ ലഹരി വിതരണ ശൃംഖലകൾ തകർക്കുന്നതിലും, അന്തർസംസ്ഥാന ബന്ധങ്ങൾ കണ്ടെത്തുന്നതിലും, സംഘടിത ലഹരി മാഫിയകളുടെ സാമ്പത്തിക സ്രോതസ്സുകൾ മരവിപ്പിക്കുന്നതിലും വലിയ വിജയമാണ് കൈവരിച്ചത്. എന്നാൽ കർശനമായ നിയമപാലന നടപടികളിലൂടെ മാത്രം ഇതിനൊരു ശാശ്വത പരിഹാരം സാധ്യമല്ല. ലഹരിക്കെതിരായ പോരാട്ടത്തിൽ 'ലഹരിയുടെ ആവശ്യം കുറയ്ക്കലും', 'പ്രാരംഭ ഘട്ടത്തിലുള്ള ഇടപെടലുകളും', ചികിത്സ, പുനരധിവാസം, സാമൂഹിക പുനഃസംയോജനം എന്നിവ താഴെത്തട്ടിൽ നിന്ന് തന്നെ ആരംഭിക്കേണ്ടതുണ്ട്.
ഈ പശ്ചാത്തലത്തിൽ, ഓപ്പറേഷൻ തൂഫാൻ രണ്ടാം ഘട്ടം കേവലമൊരു പോലീസ് കേന്ദ്രീകൃത നടപടി എന്നതിലുപരി ഒരു സമഗ്ര 'ജനകീയ മുന്നേറ്റം' ആയാണ് വിഭാവനം ചെയ്യുന്നത്. തദ്ദേശ സ്വയംഭരണ സ്ഥാപനങ്ങൾ, കേരള പോലീസ്, കുടുംബശ്രീ, ആരോഗ്യ, വിദ്യാഭ്യാസ, സാമൂഹ്യനീതി, യുവജനകാര്യ തുടങ്ങിയ വകുപ്പുകളുടെയും സംവിധാനങ്ങളുടെയും ഏകോപിത ഇടപെടലിലൂടെ ലഹരിവിരുദ്ധ പ്രവർത്തനങ്ങളെ പോലീസ് സ്റ്റേഷനുകളിൽ നിന്ന് വാർഡുകളിലേക്കും വീടുകളിലേക്കും വിദ്യാഭ്യാസ സ്ഥാപനങ്ങളിലേക്കും തൊഴിലിടങ്ങളിലേക്കും വ്യാപിപ്പിക്കുകയാണ് ഈ ഘട്ടത്തിന്റെ ലക്ഷ്യം.
ശിക്ഷാ നടപടികൾക്ക് അപ്പുറം, ഇരകളെ മുൻകൂട്ടി കണ്ടെത്തുക, ലഹരി ഉപയോഗത്തിലേക്ക് വഴുതിപ്പോകാൻ സാധ്യതയുള്ളവരെയും ഇതിനകം ഉപയോഗത്തിൽപ്പെട്ടവരെയും ആവശ്യമായ കൗൺസിലിംഗ്, ചികിത്സ, പുനരധിവാസം എന്നിവ ഉറപ്പാക്കുക, ലഹരി വ്യാപനത്തിനെതിരെ ശക്തമായ സാമൂഹിക പ്രതിരോധം സൃഷ്ടിക്കുക എന്നിവയാണ് രണ്ടാം ഘട്ടത്തിന്റെ അടിസ്ഥാന ലക്ഷ്യങ്ങൾ.
1. ലഹരിയുടെ ആവശ്യം കുറയ്ക്കൽ
ശക്തമായ ജനകീയ ഇടപെടലുകളിലൂടെ ലഹരിയോടുള്ള സാമൂഹിക താല്പര്യം കുറച്ചുകൊണ്ടുവരിക. ബോധവൽക്കരണം, കുടുംബതല ഇടപെടൽ, യുവജന പങ്കാളിത്തം എന്നിവയിലൂടെ ആകർഷണവും ഉപയോഗസാധ്യതയും കുറയ്ക്കുക.
2. വാർഡ് തല ജാഗ്രതാ സംവിധാനം
സംസ്ഥാനത്തെ 20,999 വാർഡുകളെയും (പഞ്ചായത്ത്/ മുനിസിപ്പാലിറ്റി/ കോർപ്പറേഷൻ) ലഹരിവിരുദ്ധ പ്രവർത്തനങ്ങളുടെ പ്രാഥമിക സാമൂഹിക ഇടപെടൽ കേന്ദ്രങ്ങളാക്കി മാറ്റുക.
3. സമഗ്ര പുനരധിവാസം
ലഹരിക്ക് അടിമപ്പെട്ടവരെ കുറ്റവാളികളായി കാണാതെ, കൗൺസിലിംഗ്, ചികിത്സ, ഡി-അഡിക്ഷൻ സേവനങ്ങൾ, മാനസിക പിന്തുണ എന്നിവ നൽകി സാധാരണ ജീവിതത്തിലേക്ക് മടക്കിക്കൊണ്ടുവരിക.
4. രഹസ്യ വിവരശേഖരണം
ലഹരി വിൽപ്പന, വിതരണം, ഉപയോഗം, ഹോട്ട്സ്പോട്ടുകൾ തുടങ്ങിയവ സംബന്ധിച്ച വിവരങ്ങൾ പൊതുജനങ്ങൾക്ക് സുരക്ഷിതമായും രഹസ്യാത്മകമായും പോലീസിനെ അറിയിക്കാനുള്ള സംവിധാനങ്ങൾ ശക്തിപ്പെടുത്തുക.
5. യുവജന-വിദ്യാർത്ഥി പങ്കാളിത്തം
യുവജനങ്ങളുടെയും വിദ്യാർത്ഥികളുടെയും ഊർജ്ജവും കഴിവുകളും കായികം, കല, സാംസ്കാരിക പ്രവർത്തനങ്ങൾ, സാമൂഹിക സേവനം എന്നിവയിലേക്ക് വഴിതിരിച്ചുവിട്ട് ലഹരിയിൽ നിന്ന് സുരക്ഷിതമായ സാമൂഹിക അന്തരീക്ഷം സൃഷ്ടിക്കുക.